一家人點咗個5人套餐, 餸菜極為豐富！
第一道香芒沙律大蝦球, 爽脆大蝦伴上新鮮沙律菜、香甜芒果、鮮果, 喚醒味蕾！
緊接前菜, 一大鍋魚頭湯送上, 奶白色魚湯味道天然, 唔會過度調味, 加上滑一滑嘅嫩豆腐, 互相襯托。
富貴金龍
咁大條斑用嚟炸會不會有點奢侈, 兩款炸法一邊魚球, 一邊魚片, 我就鐘意後者多D, 魚片連皮, 食落更香口酥脆。
大肉蟹 (胡椒炒)
蟹肉新鮮唔黐殼, 蟹鉗大到好似食緊雞髀咁, 正！
蒜蓉粉絲蒸蟶子皇
又大又厚肉嘅聖子, 蒸得啱啱好, 肉質保持爽嫩。
大蜆燉蛋
蒸水蛋就食得多, 但燉蛋通常係甜食, 今次呢個加上大蜆嘅燉蛋, 充滿鹹鮮味, 有新意！
士多啤梨骨
肉質非常柔軟, 骨與肉之間嘅筋腱同脂肪充滿油香, 配上濃味甜酸醬汁, 送飯一流。
金華玉樹雞
呢半邊雞, 淨係起曬骨呢一點, 就已經攞曬分！ 每件雞配上鹹中帶甜嘅火腿, 啖啖鹹香嫩滑。
上湯浸時菜
蔬菜翠綠新鮮, 上湯味道偏重。
蟹油銀芽炒面
食到尾升都有驚喜！呢個可能係我食過最好味嘅炒麵。
麵條炒得夠乾爽, 入口焦香味突出, 加入芽菜、洋蔥、韭黃等爽口配料, 令口感更豐富, 食到底都無多餘油份, 出色！
甜品
壓軸甜品係芒果布丁, 嫩滑布丁內含果肉, 甜度不會太高, 幾飽都要食埋佢！
整體用料新鮮, 每道菜份量都很大, 最緊要係長輩們食得開心, 坐得舒服！以後家庭聚餐又多個選擇啦。
