行樓梯本身係缺點，但佢又加左張路向指示仲寫埋「食飯前做下運動可以方便腸道蠕動」之類字句，算係增加左啲玩味感。上兩層左右就到，因為冇訂枱，話要等20分左右，本身唔想等，但同事想等就陪佢等一下，裡面有六七張櫈坐下，環境都幾舒服，之後應該等少過10分鐘就有位。
裝修行懷舊風格，我諗用嚟拍野或者打卡，效果會幾好。
叫左個醉雞冷麵，嚟到個個都話靚，而且酒味都好濃，好正，不過雞肉鞋鞋地，但冷盤嚟講就冇咁覺。雖然落左唔少杞子紅棗，但冇乜藥材味，因為加左糖。整體上是ok的，因為酒味濃同凍凍地感覺幾light。
同事叫左排骨飯，佢話碗飯份量都算多，不過應該唔算太好食，見佢都食淨幾多。
最後一個抵讚位，就係紙枱布，每次都會更換。可以話唔環保嘅，不過疫情下確係好安心。完！
