外賣左一碗兩餸麻醬米線，點知拎到翻屋企，乜餸都無，搞到我又要特登走多去一轉。
去到我一話乜餸都冇，店員就好似知道乜事咁，俾返我要嘅餸，個反應就好似話俾我知佢係特登咁，真係好唔老實。
最令人咋舌嘅係，個店員係帶着膠手套拖地，然後繼續戴住個膠手套去打開個外賣碗同捧住碗麵去加餸，問題係佢前一刻仲帶住個手套去揸住個勁污糟嘅地拖，成件事真係好嘔心。
出去食嘢污糟就預左，但係眼不見為乾淨都好，唔係擺喺我面前比我見到丫嘛。
而且佢哋成個地下都一灘灘水，衛生條件真係好差。
不過講翻碗麵，個麻醬湯底的確不錯，味道同濃度都不錯，食得出麻醬嘅濃厚感覺。我叫咗中辣，但係佢嘅辣度大概就係譚仔嘅小辣咁上下，而且佢個辣度唔會搶晒成個湯底嘅味道，個湯底做得真係好出色。
但係餸就真係麻麻地，雞翼尖有雪藏味而且有少少難食，芝士腸都有陣怪味。米線就不過不失，但係煮得有啲淋。
總括來講，係抵食嘅，但係唔老實同埋衛生條件差對於我來講已經夠令我唔會再回頭食。
