夏麵館 (H.A.N.D.S) (已結業)

當完一場風更，付出了氣力對抗颱風，也賺到了額外收入，本應獎勵自己食餐好，但係颱風過後，想食嘅餐廳唔一定有開，所以無特別去搵食，而且有人病左，要去探下佢陪佢食嘢，佢選擇近近地樓下食，揀左佢鍾意嘅夏麵館，我就麻麻的，不過話左黎陪人，就算啦。佢揀左食蟹粉豆腐煲、蟹粉炒飯，先黎豆腐煲，豆腐係滑但百福豆腐都做到，個芡汁無咩味，有細細件蟹肉都係無味的，邊度有蟹粉味？同埋我最憎就係有好多薑粒，啖啖都有！咁就收我九十幾蚊？跟住個蟹粉炒飯，飯同汁係分開上，個炒飯一啲都唔吸引，而且啲飯好硬好乾，好難咬，煮得唔夠水定唔夠熟？個汁又係無味，呢個就無薑粒，但都係好杰似鼻涕咁，難食到食唔到落去。唯有叫多個小籠包，味道比較可接受，係個頂皮厚左啲。夏麵館服務係幾好，我都唔算揀食嘅人，但佢嘢食實在太差，唔駛錢我都唔食！