源興燒味小館

葵興終於有間見得人嘅小菜，住咗葵興30年，都冇一間小菜係見得人，搞到我成日都要出去葵芳荃灣食飯。今日同老婆行過，見到呢間小菜，都唔知好唔好食，但又有啲肚餓，就走入去試吓啦。一坐低，我老婆就話要食麻辣鴨血，咁我就揀多個辣子雞丁，同埋鹹魚煎肉餅，嚟到碗白飯。兩個人限聚令底下食啱啱好。個鴨血一食落去，簡直喜出望外，辣就唔係好辣，但係就十分之香，嗰種麻味就係四川嘅麻辣味道！跟住食個辣子雞丁，大廚非常之犀利，將啲雞炸到非常之脆口，送啤酒真係一流！最後個肉餅鹹魚非常香，送埋碗白飯，真係大滿足！下次會再嚟食，見到好多人都有嗌雞煲，等限聚令放寬後，叫齊班兄弟試吓先！

麻辣鴨血

鹹魚煎肉餅

辣子雞丁