阿四車仔麵 (已結業)

聯和墟都有好幾間車仔麵店，今次就試下呢間叫阿四車仔麵。姐姐都幾熱情招呼，而店內嘅環境都幾乾淨企理。我揀咗個三餸麵，有豬紅、仿鮑片、溏心蛋配油麵。豬紅切得比較細粒啲，不過夾起上嚟都冇散，都可以；仿鮑片OK唔靭；溏心蛋都正，仲有少少流心。油麵就正正常常，呢度嘅秘製沙嗲汁好濃味，唔錯。另外叫咗一碗南乳豬手，豬手都乾淨無毛，仲炆得好鬼腍同入味，唔錯。提提大家，呢度有辣辣菜脯可以自行添加，仲幾好食，夠爽脆。