有一日同朋友行美麗華商場～ 經過呢間標榜「享譽新加坡的福建菜」門口，見倒呢間餐廳佈滿食客，門口更寫住係新加坡米芝蓮一星食肆，唔通福建菜真係好好味？
引起咗我地嘅好奇心，一於試下佢！
當時都另有4、5檯食客等緊位，
不過由於餐廳面積都幾大，檯數算多，
等咗5分鐘就安排倒座位俾我地。
入座後店員隨即奉上熱茶，並介紹呢個係杞子菊花茶。
杞子菊花茶入口清淡甘甜，唔錯。
店員推介店內做緊「莆田鰻魚節」，有兩款活鰻魚料理推薦選擇
點好餐之後，可以花少少時間睇下佢地嘅主餐牌，有少少餐廳簡介同莆田食材簡介。
前菜嚟啦
好靚啊！
冰浸苦瓜 $49上檯時有驚喜
竟然將苦瓜砌成一朵花～ 好靚
苦瓜切成薄片，沾上蜂蜜，食落去甘甘甜甜，好好味
朋友更覺得有少少水果味，問咗蕃薯妹幾次到底個蜜糖係咪有水果味，點解咁神奇？
莆田扁肉湯呢個係福建嘅經典菜式，食落去有少少似魚皮餃，搵返資料得知原來連個皮都係用豬腿肉製作，相當多工序先做成一粒肉扁。
湯底有少少似平時台灣飲嘅紫菜魚丸湯。
好味
每人一碗，份量啱啱好。
閩香洋燒排 $139/4條排骨炆到好淋，完全唔使力去咬佢就已經同條骨分開，易入口。醬汁酸酸甜甜，相當開胃。
興化炒米粉$86米粉好幼，炒得夠乾身，口感獨特，有米香味道
材料足
除咗有兩隻大蝦仁，米粉底部有蜆。
鐵板香煎活鰻魚 $148呢個菜式上檯時香氣撲鼻
鐵板吱吱聲～ 吸引店員只提供檸檬，叫我地食之前唧檸檬汁，趁熱食。
無諗過完全無任何醬汁，就咁香煎嘅鰻魚會咁好味。鰻魚夠厚肉， 魚肉厚實質感好，魚皮煎到好香脆，簡單有少少鹽味加少少檸檬汁已經非常正！
價錢合理，菜式味道質素好。
好滿足嘅晚餐
非常推薦俾大家~最後附上部份餐牌俾大家參考下~
1
