Castle Cafe (已結業)

一兩年前曾經同同事光顧過餐廳，印象中下午茶價錢都幾平同抵食。最近諗唔到晏晝食咩，決定同朋友再度試試，發現午市套餐價錢同樣親民，各種經典西餐$50-$60就食到，算係糧尾一族嘅福音。紐西蘭西冷牛扒黑椒汁配薯角 $55貼地價錢就品嚐到足料西冷牛扒，肉質煎得焦香帶嚼勁。配上微辣惹味嘅黑椒汁，約7成熟嘅牛扒更顯香口。值得一提嘅係套餐中嘅薯角，炸得金黄，上枱已經飄出陣陣薯香。 面層嘅調味料完美同薯角結合，食落既有薯香又夠鹹香。芝士焗波士頓龍蝦拼香煎雞扒配薯角 $68Happy Friday豪嘆波士頓龍蝦餐就最好不過，配上大大件雞扒同薯角都係$70有找。半邊波士頓龍蝦表面鋪上厚厚一層芝士同香草碎，經烘焗後愈發濃郁芝士香氣。淋上橙紅色洋蔥汁，令龍蝦鹹中帶甜。意大利芝士餅咖啡 $24咖啡帶有淡淡意大利芝士甜味，順滑易入口。加上面層有輕盈泡沫，即使唔太喜好咖啡都接受到。蘋果哈密瓜鮮果牛奶 $31初嚐雙拼款式鮮果牛奶，第一次選擇咁新穎嘅配搭，感覺又幾清新。淡黄色奶昔透出少許哈密瓜味，同時混有蘋果酸味同果渣，感覺幾健康。