**薯仔排骨湯 ($168) + 蕎麥麵 ($25)**
一上枱已經聞到好香嘅豬骨味，飲落濃郁得嚟唔會過鹹。排骨煮到好軟腍，用筷子輕輕一夾就已經骨肉分離，而且份量都幾多。薯仔吸收晒湯汁精華，入口粉糯。加$25配咗蕎麥麵，麵質彈牙，索晒啲湯汁真係一流！建議兩個人分享，夠晒飽肚。
**醬炒牛肉石鍋芝士拌飯 ($138)**
真心推薦！熱辣辣嘅石鍋上枱，飯底係紅米飯，有滿滿蔬菜。店員提醒要趁熱拌勻。一撈起就見到超邪惡嘅芝士拉絲效果，視覺效果滿分！牛肉用韓式辣醬炒得香濃，加上泡菜、紫菜、蔬菜等配料，口感豐富。最正係飯焦嘅部分，金香脆口，同軟綿嘅芝士形成強烈對比，食到最後一啖都係咁好味。
**餃子王 / 泡菜餃子王 (各$18)**
兩款餃子都係即叫即蒸。外皮彈牙。原味餃子王餡料以豬肉同菜為主，味道傳統，好足料；個人更鍾意泡菜口味，微辣嘅泡菜豬肉餡更加惹味，值得encore！
整體而言，韓屋嘅食物質素高，價錢合理（人均$150-$200），服務都幾好。後來我地先發現網上訂座有9折兼賺Rice Dollars，性價比更高。會再嚟幫襯！
1
