樂湯雞麵館 x 火鍋 (西洋菜南街) (已結業)

不如大小平貴，間間都話限時，想坐低慢慢嘆下傾下計都難，幸好有樂湯雞。上次試咗湯麵，湯濃雞滑，仲有多種配搭，刀削麵極力推介。今次 encore 再試火鍋，食火鍋除咗食物質素及湯底，座位寬落都好重，否則叫多兩碟已無位擺。樂湯雞位同位之間有足夠空間，唔會郁啲就係同隔離枱互撞。卡位張枱夠哂大，可以碟碟上哂枱，想食咩就食咩，唔駛迫住食完一碟先換另碟。職員有禮，自動自覺幫你加湯。叫咗果花膠雞湯，職員仲提我哋先飲碗湯再開始打邊爐，湯底半隻雞仲會𢳂起幫我哋切好再上碟，唔駛我哋係鍋度手撕咁輪盡。打邊爐，牛就係必須，我哋揀咗隱陣嘅牛小排，有些少嚼口；雲吞夠大粒，餡料夠豐富；蝦滑墨魚滑夠鮮味。不得不試嘅新鮮炸起響鈴，真係好脆。其他都係火鍋常叫食物，唯獨無海鮮，當晚連魚類都無貨，有啲可惜。我哋由7點坐度10點幾，職員都無表現過不滿或者想催你走（上次食麵都一樣）。相比得坊間，有啲明明都無客，都堅持90分鐘趕你走，或者一食完就即刻收枱叫你埋單，想飲多啖水都阻住佢收工。