Burger Joys (士丹利街) (已結業)

今日要返part time，中間空檔同同事到中環Burger Joys食晚餐。叫左兩個漢堡，其中一個加$41跟餐，要薯堡，再加$31要雲尼拿奶昔，散叫經典水牛雞翼同可樂。芝士牛肉漢堡夾住生菜、番茄、紫洋葱、酸瓜。麵包鬆軟，牛肉鬆化唔會好實又juicy，整體好唔錯。魚柳漢堡大大個，魚柳好厚，啖啖魚肉，炸得香脆唔油膩，好味。薯堡好少見，所以要薯唔要薯條，食落脆卜卜，鍾意薯堡之人一定要揀。經典水牛雞翼辣辣的，好惹味。飲品係可樂同雲尼拿奶昔。雲尼拿奶昔好正，唔會太甜又好幼滑，忌廉亦順滑，雖然十分邪惡但好滿足。