肉骨皇 (已結業)

朋友知道我鍾意食肉骨茶，不管係星加坡style或馬來西亞style我都喜歡，所以曾經向我介紹過呢間餐廳，今日喺天后，就特登行過去大坑呢間餐廳試吓。叫咗佢$68嘅肉骨茶午餐，好快就嚟到，見到有四件大大嘅排骨，感覺材料充實。試一啖湯，非常濃郁美味，兼帶有淡淡的藥材味、胡椒味、少少甜味，味道非常有層次；湯唔算深色亦唔算淺；味道同顏色都似乎係星加坡同馬來西亞肉骨茶嘅fusion版（星加坡肉骨茶一般顏色較淺，胡椒味較重；馬來西亞肉骨茶一般顏色較深，藥材味重），總之好味😋呢個肉骨茶仲可以配白飯或油飯，從來未見過肉骨茶配黃油飯，梗係要試吓。黃油飯大大碗香噴噴黃淦淦，配肉骨茶食又幾夾喎。加$10仲有碟蠔油青菜🥬，食得健康啲。仲叫咗個$108嘅「柚子蝦沙律」，蝦肉結實，柚子加上紅蘿蔔絲同椰菜，撈埋酸甜汁，非常開胃。加$8可以叫個鹹檸七，清涼解渴，正。