一坐低我哋就嗌咗幾款送酒小食。個土佐豆腐真係不得了！外皮炸到脆卜卜，但入面嘅豆腐仲係好滑，上面灑滿咗木魚花再一齊去炸！食落去又香又滑，送酒一流！
跟住個黃金焗蠔上枱，蠔身大大隻，面頭鋪滿咗濃濃嘅蛋黃醬，焗到金黃色，一啖咬落去，蠔汁爆出嚟，仲有拉絲效果，香濃到不得了！連埋裝飾菜一齊食好好食！
燒物方面，雞頸肉真係第一次試，估唔到咁有驚喜！肉質比普通雞肉更加爽口彈牙，燒到微微焦香。仲有個紫蘇雞皮蝦，師傅將雞皮包住隻蝦一齊燒，雞皮嘅油香滲入蝦肉度，加上紫蘇葉嘅香氣，味道層次好豐富！
八焱卷係佢哋嘅招牌菜，呢個卷物有鵝肝海膽喺上面，好精緻^_^
壓軸有甲羅燒，即係蟹膏撈蟹肉放返入蟹蓋度燒。熱辣辣上枱，搽上脆卜卜嘅脆脆度食，個種濃郁嘅蟹膏香，真係食到舔舔脷！
最後牛肉烏冬暖下個胃，湯底清甜，牛肉超嫩滑，烏冬又彈牙！
