琥酌 (已搬遷) 新店位置

今晚book左食呢間想試好耐既日式吉列牛專門店，為左食呢餐我特登早收工去跑步，想減完肥再好好慰勞自己!! 餐廳位於尖沙咀旺區既一間商業大廈樓上，好近地鐵站位置好易搵。首先有前菜海蜇沙律，酸酸甜甜幾開胃。我地點左一客安格斯牛吉列($368) 價錢偏貴但質素有保證。生牛肉外面包左一層吉列粉，烤大概10秒後就食得。咬落脆口而肉又嫩，口感頗特別。博多明太子玉子燒($48) 唔算太出色，蛋唔夠嫩滑多汁，但勝在明太子份量夠多夠香口。一品琥酌炒飯($148) 有一粒煎過既帶子同烤過既鮑魚。帶子煎得較乾身，鮑魚就烤得岩岩好。炒飯有香濃燒汁味，惟味道偏咸。鳥手羽燒 ($38) 串燒水準唔錯，熱辣辣即叫即燒，雞皮燒得好香脆，雞肉有肉汁，咸度適中