The Market

等到頸都長埋，今次終於食到！傳說中嘅榴槤自助餐。先講價錢，每人平均$950左右，其實都幾貴，事關比起其他酒店嘅自助餐，佢都差不多貴成$100，不過鍾意食榴槤就冇計啦，點都要朝聖一次。嘢食嘅款式唔係好多，不過質素好好！其中我最推介嘅係佢個蟹粥（可惜冇影相），羊架同埋佢啲刺身。生蠔反而中規中矩冇乜特別。不過係呢度，所有嘢都係其次，主要係食榴槤。佢一甜品有大部份都係榴槤製品，不過坦白講，一般般。但係大家唔好失望，因為佢嘅重頭戲係榴槤雪糕同埋任你拎嘅榴槤醬以及榴槤斑斕醬。榴槤味濃，又夠香甜，淨係食呢樣嘢都值回票價。同場加映，godiva黑朱古力雪糕，呢個又係必食！