海景粥店茶餐廳 (已結業)

我係一個對羅宋湯極度無抵抗能力嘅人，一見到就會想飲，但好味嘅羅宋湯真係唔係度度都有。記得係以前偶然發覺呢間餐廳有個羅宋湯餐，一試之下真係驚為天人，從此就一諗起就嚟食。呢個餐重點故之然係羅宋湯，可以揀意粉、米粉、螺絲粉之類。隨餐仲有多士、煎\炒蛋、腸仔\火腿\餐肉(任揀一款，我嘅味覺判斷，應該係廚師牌雞肉腸，即刻令個餐價值高咗)，仲有餐飲。我好鐘意呢個羅宋湯係因為佢個味好濃，唔會好稀好水，少少羅宋湯嘅辣味，仲有好多蔬菜，連我朋友試過都話”卒之知道點解你咁鐘意食喇”。如果唔想要餐，剩係叫個湯都可以，大大碗都係十幾蚊，有時我唔太肚餓，都係飲個湯就算。而且呢度個凍檸茶都幾好飲，個牛脷酥都好好食，個人覺得係比另一間海字頭嘅舖頭好食，就算凍咗個味都ok。P.S.試過當我叫牛脷酥，個落單姐姐會問你”要唔要剪(條牛脷酥)”，有次我聽錯以為姐姐問我”要唔要錢”，嗰下真係呆咗一呆，諗返都好好笑。