阿爺粥品手工涮涮鍋 (已結業)

同朋友新居入伙慶祝，住荃灣附近，得知附近有一間新嘅粥品火鍋開張， 我哋又懷着探險嘅心情去試吓！地點都好就腳喺市中心附近，附近就係好多大型屋苑落成嘅地方。店入邊都好寬敞！我哋幫襯當日原來仲係試業期間！啱啱開張。食物選擇不少，有火鍋用嘅亦都有熱盤小食。呢度用新式嘅打邊爐筷子，樟木頭插上筷子就可以用，唔使全對都係木咁唔環保。好方便！餐前小食送咗個熱烘山葵俾我哋。外表好脆， 冇咗山葵滑潺潺嗰種口感。好可口！第一次用呢個食法， 估唔到健康得來又好味！話明粥底火鍋，我哋就揀咗阿爺有米粥底。 本身足底偏淡， 所以我哋加左大量粟米同海鮮落去調味。清清地打邊爐都唔錯呀！大蚌鮮甜肉厚！花蟹肉不多，但好甜好新鮮。牛肩脊好有牛味，唔韌又好𡁻口，食落油脂均勻！好正！油炸鬼勁脆，配粥食係絕配。原本以為最平平無奇，但食落有驚喜！Wasabi 墨魚丸好特別！鮮打墨魚滑夠彈牙，中間夾住d wasabi夠哂刺激！估唔到兩樣野撈埋一齊咁夾！忌廉士多啤梨冰，上台望見外型好特別，不過驚喜不大。呢餐入伙餐質素唔錯，雖然試業中有小小甩漏，但服務員態度都好好。希望水準能夠保持啦！