今日有個新相識既朋友係柴灣收工話過黎筲箕灣食飯~本來我唸住去佳寶食既,但我朋友行過入去話唔係咁鍾意...佢就同我講話記得筲箕灣近住東大街有間幾好食,原來佢之前成日過黎筲箕灣去教會同D教友都會去依度食飯。我見佢話有好介紹緊係試一試啦;P
行到黎原來就係話依間
麗姐茶餐廳@_@平時成日行過不過就未入過去食~但周不時都見到好似幾多人咁。
今日第一次入去,鋪位唔係大,似係自家生意。全部都係卡位,原來門口收銀上面有部電視添@O@岩晒我依D電視迷^^不過如果要睇環境既未必岩依度,不過依度有D香港地風味^^唔錯!
餐牌唔多,不過晚飯既選擇都算齊,雞牛豬魚都有~仲有蒸魚餐添都係35蚊咋!!
不過我地大約8點9去食已經無晒蒸魚喇>_<
我地叫左2個餸::
豆腐斑腩煲,啫啫滑雞煲。
等左5分鐘多個豆腐斑腩煲到左,阿姐就叫入面筆2個飯比我地,服務都算OK。
個煲唔係好大,但係D餸都唔少喎~好多舊魚!!
飯唔算大碗,如果係飯桶起碼要食兩碗。
食左唔夠2~3分鐘個啫啫滑雞煲都到左。依度既雞煲原來用叉燒拌碟咖~第一次咁食,味道都幾好,D雞係雞翼仲有D係大大舊雞添!!
估唔到D煲比出面既細,但係D料就仲多過出面既!!我咁大食都可以食唔晒!!
33蚊個餐可以揀跟野飲或者跟湯,同其他筲箕灣既茶餐廳晚餐相比,價錢係差唔多但係野食真係好足料好夠食!!
味道唔錯又足料!!下次一定會再黎^^自己一個黎食都得!!
1
1
