越一越南牛肉粉專門店 (已結業)

夾埋其它分店，今次已經係差唔多第十次食越一啦。間中飲下個越南牛肉湯底，真係成身舒服曬。今次叫左個二人套餐D $238越式牛油軟殼蟹；扎肉蒸粉包4件；上湯生菜；生牛肉河粉；香矛豬扒河；再加兩杯飲品呢個餐最矜貴既，就係呢個越式牛油軟殼蟹啦，啲蟹好鮮甜，外皮炸粉好香牛油味，鍾意食海鮮嘅朋友一定要試。扎肉蒸粉包4件，都係水準之作，每個包既粉皮都好薄，香菇絲甘筍絲餡料非常之多，重要另外配多一片越南扎肉係面，賣相真係好出色，食落去個味道就更加好。生牛肉河粉係我最期待嘅食物出現，清澈唔油膩，但係香濃至極既湯底，鍾意食Pho既就知我講乜。就算第一次食嘅話相信都會即刻愛上，每一啖湯飲落去都好舒服，配合埋啱啱夠熟既牛肉同河粉，真係令我好滿足。飲品貪心咗啲，加錢叫菠蘿冰特飲，個菠蘿冰真係好大個，唔單止用個菠蘿殼載住，裏面嘅菠蘿肉都唔少。由於太得意嘅關係，我忍唔住係咁影相擺上網。鍾意食越南湯河嘅一定要黎試，除咗牛之外呢間店裏面嘅其他食物都好出色，例如今次點左嘅蒜蓉包，味道同賣相都好好，睇吓啲相你就知。