環境
用霓虹燈做裝飾，襯少許中國風，玩Cross Over，行搞笑路線，襯返招牌名「去滾」，幾得意同特別，座位亦好寬敞，坐得好舒服。每人贈附圍裙，可以比客人拎走。
餐牌
原個椰子雞湯(半隻) $268
鍋端上枱之後，店員分別會放雞件及將即開嘅新鮮椰子水倒落湯鍋，再刮入面嘅椰肉落去。湯底十分雪白，先試下湯底，帶椰汁鮮甜，潤喉舒服，除咗椰子，仲有馬碲、竹笙等配料，夠哂滋補。雞件亦好快熟透，我地將雞件主要作熬湯之用，所以煮嘅時間比較長，食起上嚟就一定會老咗少少。
至尊天九牛腩頭 $378
紋路分明色澤鮮紅，只要焯幾下就食得，牛腩食得多，牛腩頭就好似第一次食，一入口牛味十分濃厚，有咬口，配上清甜湯底，更加能突顯牛本身嘅鮮味。
原隻貴妃蚌 $58/隻
咁清甜嘅湯底，當然要帶啲海鮮襯下，眾多海鮮之中揀咗貴妃蚌，新鮮鮮甜。
火雞姐搞唔掂 手剁牛肉餃 $58/4隻
個名好盞鬼，係手剁牛肉，一咬開入邊粉紅色，好有咬口，鍾意餃子皮唔會好粉同太厚。
哈波子 手打蝦丸 $68/4粒
打邊爐又點可以唔食手打蝦丸， size都幾大粒，咬落彈牙，配醬油食鮮味更出。
百花齊放蔬菜拼盤 $88
食麻辣火鍋我反而盡量避免食蔬菜，因為吸晒啲油，但食咁滋補嘅湯底，當然要嗌啲蔬菜索下湯底食滋補下啦！
唔係椰菜花 椰香脆麻花 $48
甜品就嗌左個脆麻花，一上枱我同另一半都嚇親，估唔到脆麻花擺盤都咁靚，入口仲係熱，脆口十足，為今晚畫上完美句號。
總括然而，餐廳走時尚路線，裝修特別，特登用「去滾」做招牌，玩詼諧音同意思，餐牌就用女人身影裝飾，夠晒諗頭，食物新鮮高質，縱使價錢略高，適合喜愛享受高級打邊爐嘅上班族。
