漁獲浜燒 (已結業)

入到日本餐廳我嘅首選係坐bar枱位置，咁可以同睇到師傅烹調過程亦都可以交流一下，今次亦都一如我所願😽😽先嚟前菜係一份細嘅芝麻鹽醬椰菜。入口十分清新爽脆，有開胃嘅效果。之後就叫咗份沖繩風沙律。入面刺身嘅款式同份量都毫不吝嗇地多，好似係三文魚，帶子，吞拿魚和八爪魚。刺身新鮮肥美，再配搭苦瓜同海葡萄一齊食，亦都好鮮甜。接住呢份帶子海膽魚子醬就令我食出奢侈的享受，海膽嘅幽香加埋厚肉嘅帶子，包住塊脆紫菜放入口，十分享受。之後當然就到燒海鮮嘅部份，店員十分細心，會係燒之前先介紹海鮮，再俾大家影埋相打卡，最後幫你逐件逐件燒。帆立貝燒得剛剛好，十分彈牙。個人喜歡用清酒燒的煮法，更能突顯肉嘅鮮味。燒鮑魚亦無過分調味，食到海鮮嘅原汁原味，口感亦爽。燒龍蝦是今晚嘅重頭戲。隻龍蝦本身有好多膏，燒完出嚟更加惹味，龍蝦肉唔粘牙，鮮甜肥美。去到最後食埋呢個酸酸甜甜嘅柚子雪葩做甜點，好香柚子味，食完咁多海鮮食返個清清地嘅甜品就好完滿。