手沖咖啡同平時連鎖店飲到既咖啡完全唔同，細細品嚐有不同層次，而且唔同溫度都有差別，熱既時留係嘴齒間既澀味會重d，涼少少香味會比較濃，淡淡既酸味同冇苦澀味。
主菜係慢煮butcher steak，味道濃郁，牛味重，經過細心處理改件，令佢同時好軟淋易咬冇筋，配上薯蓉，新鮮薯仔打蓉好有薯味同留有少許薯粒，黑醋沙律開胃驅散牛既油膩感。
另外仲有慢煮溫泉蛋手撕豬肉意粉，豬肉經過慢煮覺得已經變成另一種口感，有少許似吞拿魚，配上多種香草同少許辣味，撈埋溫泉蛋黎食，食唔停口。
最後臨走我再叫多左一杯手沖咖啡，咖啡師話係呢種豆係屬於音樂家系列，叫巴哈，磨粉前比我地聞一聞，除左咖啡味仲有陣香濃既酒味，非常有趣，飲落比之前既咖啡少左酸味，好似飲緊好溫和既威士忌，非常得意!下次會再上黎試其他豆
