豪華海鮮丼茶漬飯 $178
餐廳提供了茶漬飯的吃法，先品嚐刺身，然後把餸同飯放入細碗，把湯倒落個碗。
海鮮全是刺身，鋪滿飯面，新鮮可口，三文魚肥美，吞拿魚赤身魚味濃郁，三文魚籽爽口，牡丹蝦香甜，帆立貝滑身厚實。
湯方面有鰹魚昆布湯同蝦湯選擇，我們選咗鰹魚昆布湯。太豪氣一次過倒咗落個大碗，不過都唔怕，個湯清清哋飲落好舒服，唔會蓋過刺身嘅味道，加上山葵更能提鮮。
海鮮蕃茄拉麵 $108
都幾大碗，麵雖幼身但軟硬適中，容易掛湯。蕃茄湯底香濃開胃，唔會太鹹亦唔會好膩。
海鮮有蜆、魷魚同蝦，最驚喜係蜆肉數量又多又大隻，厚身鮮甜。
旬之野菜 跟主食+$30
每次食飯都好需要一碟菜，呢度嘅炒菜材料不少，有椰菜、洋蔥、菇、黃椒、蘿蔔等，以黑椒和芝麻調味，味道不錯。
紅葉三重奏 $98
啱晒有選擇困難嘅朋友。呢個set有蕨餅、抹茶雲石紋芝士蛋糕及迷你芭菲！
原味蕨餅柔滑軟糯，味道微甜，可以同其餘兩款甜品一齊食。抹茶雲石紋芝土蛋糕個樣幾靚，以抹茶同芝士嘅交織紋理模仿雲石，見到就想食。抹茶甘香濃郁，芝士不會好膩，反而係好溫柔，兩者味道相互輝映，完美配搭。
迷你芭菲有多種口味選擇，我哋揀咗雜莓。每次見到芭菲都無法抗拒，雲尼拿雪糕同雜莓好夾，穀物脆片為口感帶來不同層次。
紅葉甘之三味 $88
又係啱晒乜都想試嘅朋友。今次呢個set有提拉米蘇、牛奶布甸同雪糕（好可惜是日冇軟雪糕）。
抹茶提拉米蘇以木枡盛載，和風滿滿，抹茶甘香濃郁，中間的cheese質感幼滑輕盈，海綿蛋糕空氣感十足，Ichiban。
牛奶布甸奶味香濃，口感軟滑，上面嘅士多啤梨同果醬，增添風味。
和風氛圍同食物，尤其個樣吸引嘅甜品，可以一解鄉愁。
以上價格需另加一服務費
