6
15
試咗幾款招牌菜，真係好有驚喜！首先係小食拼盤，香茅雞翼一上枱就聞到陣陣香茅味，雞翼外皮炸得金黃酥脆，咬落去肉質嫩滑。跟住係炭燒豬頸肉，豬頸肉燒得啱啱好，外皮微焦，肉質彈牙，配上泰式酸辣醬，味道更加豐富。酸辣無骨鳳爪係我嘅最愛，鳳爪處理得乾淨，無骨之餘仲保持咗爽脆口感，酸辣汁調得恰到好處，酸中帶辣，好醒胃！香辣脆蝦片就係一款好適合送酒嘅小食，蝦片炸得脆卜卜，辣味唔會太搶，食落好過癮。
串燒叫左炭燒沙嗲牛，燒得香噴噴，牛肉嫩滑多汁，沙嗲醬香濃惹味，每一啖都充滿泰式風情。
泰式椰子鮮雞湯亦係一大亮點，湯底椰香濃郁，雞肉鮮嫩，仲有少少香茅同檸檬葉嘅清香，飲落好暖胃。
酒香火焰骨係一道視覺同味覺雙重享受嘅菜式，上枱時點火，火焰熊熊，酒香四溢，排骨燒得入味，肉質鬆軟，帶微微酒香，好特別！
泰胡椒和牛炒糯米河亦係一絕，和牛嫩滑，糯米河炒得乾身，泰胡椒嘅香辣味令人食慾大增。
黑糖椰子雪糕為呢餐畫上完美句號，雪糕椰香濃郁，黑糖醬甜而不膩，口感順滑，食完真係好滿足！
野飲我叫左原隻椰青水，椰青新鮮清甜，飲落冰涼解渴，椰香味十足，仲可以食埋入面嘅椰肉，口感滑嫩，完全係夏日消暑嘅首選！
朋友係係Pineapple Punch，用咗Scotch Whisky、Dark Rum、Coconut、Pineapple同Lime調製。入口先係菠蘿嘅甜味，跟住係Whisky同Rum嘅醇厚，酒精同果香平衡得好好，飲落好順喉，好適合鍾意輕微酒味嘅朋友。
