荃灣百悅坊呢間「燒烤堂」長期人氣高企，12樓高空景觀加上即叫即燒嘅炭火串燒，晚晚都人山人海！我今次試勻佢哋16款食物，同大家開箱呢間「串燒界天花板」！
和牛棒（配松露一口飯）同焦糖青蘋果鵝肝多士絕對係必食！和牛棒肉質嫩滑牛味濃郁，同松露飯撈勻月見蛋汁，入口即溶。最特別係店員會教你「一啖和牛一啖飯」嘅食法，黑松露香氣滿滿，食落好有儀式感。而鵝肝多士呢個甜品真係好有驚喜，鵝肝外脆內軟，油香爆燈，配上青蘋果嘅酸甜同多士嘅香脆，層次勁豐富。
海鮮類嘅鹽燒白鱔魚皮燒到脆卜卜，魚油甘香滿溢，啖啖肉又去哂骨。厚切鹽燒牛舌拖羅亦好出色，牛舌芯部位超厚切，口感爽彈，牛味濃郁，簡單鹽燒調味加少少檸檬汁已經夠晒惹味。
另外，焦糖鰻魚芝士玉子燒都做得好有心思，玉子燒包住鰻魚同流心芝士，面層仲有焦糖脆片，口感豐富。創意卷物系列有豚肉日本蘋果卷同牛油果豚肉卷，果香同豚肉油脂完美平衡，口感好特別。肉類王者系列，鹽燒A4宮崎和牛嘅雪花靚到犯規，燒5成熟最完美，入口即溶肉味牛香完美演繹。福岡味噌松板豬口感爽脆彈牙，味噌醃到入味帶甜，配Sapporo啤酒簡直天作之合。仲有手切新鮮牛胸爽，口感清脆，越嚼越出牛油香，不過呢款好容易賣晒，建議一坐低就點。
雞物專門嘅汁燒免治雞肉軟骨棒、汁燒赤雞心同鹽燒原塊雞皮，都處理得好乾淨，燒得好香，完全冇內臟腥味。
呢度嘅串燒款式多到令人有選擇困難，尤其和牛棒同鵝肝多士真係必試！環境充滿日本居酒屋氛圍，好適合一班人吹水飲酒。不過呢度人氣好高，記得預早book位！
