民華餐廳 (已結業)

今日去左堅尼地城，喺地鐵站一出就見到間好多食肆，我就入咗去民華餐廳，嗰度好光猛，坐得好舒服有卡位。朋友叫咗秘製豬軟骨飯套餐$56，配飲品凍飲加$3，天氣好熱所以嗌左凍飲，叫咗凍檸茶少甜，個檸茶好有茶餐廳風味同茶味。秘製豬軟骨同飯分開上，汁唔會整到啲飯淋晒，仲有一隻煎蛋，雖然蛋未做到留心效果，但都好好味配飯一流。豬軟骨好淋好味唔會太咸。我呢個點心怪見到有得叫點心，又忍唔住叫咗幾個黎食，點心似係一早蒸定，因為好快就上菜。山竹牛肉$17，有好多喼汁，牛肉都幾彈口。鵪鶉蛋燒賣$17，呢個就麻麻哋。雞札$18，都ok，裏面有雞件、芋頭、豬肚，都幾大件。西多士$20，最後食咗個西多士做甜品。即叫即整，新鮮熱辣，麵包軟綿綿，蛋漿好厚身，不錯嘅多士，可以配煉奶或者糖漿，我哋揀咗煉奶。