雋太日本料理 (已結業)

之前幫襯過幾次，覺得唔錯，最近又好想食放題，所以又再黎呢間翻兜。不過唔知係回憶總是被美化，定係真係水準下降，今次認真麻麻地。BOOK左位，又排左隊，不過佢都係安排我地坐直門口，成餐飯不停比人撞椅背。有問過可唔可以轉位，店員又話無得轉，安排好哂。但係其實所有人入哂座之後，都仲有好多靠邊卡位。諗唔明佢所謂既安排好哂係咩意思 坐低就即刻落單，我地應該係全場最快落單個批，但係望住周圍既人既野食已經到左，唯獨係我地個台就無野食……第一輪叫既係刺身，等左一陣未黎，就唯有落住單叫第二D先，點知第二輪叫既芝士焗蠔仲快過D刺身黎，無奈地唯有食左D蠔先，好彩D蠔都幾好食。等左好耐終於黎喇D刺身，甜蝦一如以往好大隻，幾好味，不過D三文魚就切到好細塊，好似碎上左咁。吞拿魚就，一般係香港都好難食到好味架喇，所以都無乜期望。其他都唔錯，希靈魚琴晚特別好味。後尾貪得意試左大阪燒，如果係想食日本個款大阪燒，咁呢度就完全唔係個回事。唯一可以讚既係個汁幾好味既。其實整體黎講野食係OK既，不過漏單情況都幾嚴重，如果見唔對路，真係要追一追單。