周街揾嘢食，見到「初見」個名好特別，加上見到餐牌有幾款嘢食好似幾吸引，一於入去食吓先🤟🏻
入到舖頭雖然人流較多，但坐得都幾舒服😌一啲唔覺得逼！
我第一時間就睇好餐牌決定點👆🏻初見香草吉列牛、日式鐵板炸菜肉餃子、日式咖喱吉列豬扒配白飯！
大約5分鐘左右就嚟咗我超期待嘅初見香草吉列牛，見到每件牛肉都有雪花，賣相唔錯！
我即刻將啲牛脂放上石板上，先煎出啲油脂出嚟後，緊住即刻將牛肉放埋上去，每邊煎三十秒左右，七成熟就趁熱食啦！食前點埋個醬，嘩🤩咬落塊牛肉好柔軟，同嗰個醬好配合，突出牛肉濃味，又唔靭，果然無令我失望😍只可惜個溏心蛋就放咗喺碟牛肉上，我忍唔住喺食之前放咗上石板煎一煎！始終生熟食物放埋一齊唔係咁好，但如果分開放就會好啲，令我食得安心啲！
日式咖喱吉列豬扒炸得好鬆脆，咖喱汁屬於甘口，入面有啲蔬菜，而咖喱汁係另外用碗裝起，我鍾意咁樣，唔會令啲豬扒變腍！豬扒比我想像中有啲單薄，如果塊豬扒厚多少少，口感就會變得更加好😋
日式鐵板煎炸菜肉餃子皮薄，咬落有肉汁，不過不失！
最後我忍唔到點咗一件炸和風甘栗紫薯餅做甜品作為結尾，炸得好脆，咬得出有一粒粒栗子肉，又唔會太甜，勁好食😋
我好欣賞<初見>嘅炸功同運用食材做一啲較特色嘅菜式！例如意大利飯、漢煲包等，一於下次再食過！
