灑家燒味小廚 (已結業)

每年大年初一都一定非常忙碌，整天都去長輩家中拜年，一個早上加下午就要走遍大半個香港，家中7人車係今日可以話係大派用場，天水圍亦都係我每年唯一一日會入，今日5點去完天水圍，之後要送外母大人返回屯門，立刻尋找屯門年中無休嘅食店。係VCITY我地發現大部份食店都有開，加上地點方便又有停車場配套。最後外母大人想快食快走，點選灑家燒味小廚，一大重點餐廳並冇因為公眾假期而額外收附加費。南乳豬手麵嘅豬手好淋好入味，南乳味亦香濃。皮蛋瘦肉粥嘅粥底夠厚，新年食太多油膩食物，下火就一流。滑蛋粟米豬扒用嚟比小朋友伴飯，滑蛋粟米好香滑，豬扒份量亦多 ＄68 好抵食。最後再點一碟無骨沙薑風味雞半隻，沙薑味夠濃烈，無骨啱比小朋友食，雞味亦算唔錯。新年公眾假期食物質素唔錯，但係要提一提大家如果想FREE PARKING就一定要用電子簽賬單，如果唔係要自付停車場費用。