城中鴨子

城中鴨子最出名就緊係片皮鴨啦，因為係星期六所以特別多人，我地兩個人大概要等30張枱，係出面等位果陣可以係玻璃窗出邊見到一位員工係到切緊啲超級肥美嘅鴨，真係睇見到流晒口水。

片皮鴨

首先，我哋嗌左半隻片皮鴨，上到嚟先發現原來份量都唔少。佢同一般嘅片皮鴨好唔同，因為佢係一塊塊好肥嘅鴨皮下面擺咗啲厚切嘅鴨肉，鴨肉好香，再用佢嗰塊好煙韌嘅皮去包住肥美嘅鴨皮同埋鴨肉，仲可以包埋青瓜、蔥同埋點佢哋嘅醬汁，真係好好味。

1

土雞湯小雲吞

另外我哋仲嗌咗土雞湯小雲吞，大概有十粒雲吞，個雞湯底超級香，雲吞皮薄餡靚，唔使5分鐘就已經全部食晒。

金華火腿扒津白

金華火腿扒津白嘅芡汁好稠，鋪喺上面嘅金華火腿好香口，如果怕食片皮鴨太肥膩，就可以嗌碟菜黎中和一下。

最後因為佢本身冇主動提供茶水，所以我哋就嗌咗玫瑰普洱茶。佢根據人數黎放茶包，用茶壺沖好之後，就擺喺蠟燭上面一直加熱，所以可以一邊飲到熱辣辣嘅茶，一邊食好嘢。

希望下次可以試吓佢其他出名嘅菜式啦。