香河越南餐廳 (已結業)

人在銅鑼灣，想起香河快要結業，把握機會光顧一下。晚上九點左右，見店前出現一條小人龍，趕緊排隊。店員推門出來看見人龍，驚呼一句：嘩咁多人嘅！回店內，再出來派飛，話有飛就有得等，冇飛就冇得等啦！我們有幸排在隊尾，獲得最後的入場卷。十分鐘左右就可就坐。今晚點了：扎肉蒸粉卷扎肉質地結實美味，但粉卷皮有少許穿破，魚露亦太稀，沒有應有的咸甜酸鮮。炸春卷春卷皮太厚，炸完後變硬，春卷亦太粗，包完生菜之後成個拳頭咁大，好論盡。建議將份量分為三條（六件）會比較容易食。春卷是新鮮炸熱辣辣，但敗筆亦是在無味的魚露上。茄汁牛腩煲伴法包茄汁好好味！甜甜地有洋蔥香料等，點法包一流。四件唔夠喉再要多點一客，成煲汁一滴冇剩。説是牛腩煲但牛筋還要多，啱哂我！紅蘿蔔亦非常可口。食物水準不過不失，但絶對有懷舊的氣氛，要幫襯仲有兩個半月。這些開了幾十年的老店正一間間消失，可悲！不久之前經過，還在說可以撐咁耐，一定係自己舖，話口未完就.....！營業時間雖然話係十一點，但佢九點半左右就不再收客，有心幫襯就唔好咁夜呀！