Bulldog Hotdog (廣福道) (已搬遷) 新店位置

踩完單車又係時候去大埔揾食，今日呢間係朋友 極力推介嘅小店- Bulldog Hotdog。淨係睇個舖名都知係主力賣熱狗。熱狗有十幾個款式，價錢30幾至60蚊不等。另外都有薯條、薯角，雞翼等小食。傍晚六點幾嚟到人流未算好多， 好快就落咗單。未幾顧客就開始陸續有嚟，出現短短人龍。 熱狗製作需時，等候時間頗長，大約十幾分鐘。招牌熱狗 （$50）中間肉醬辣辣地，食落好惹味。上面鋪咗酸忌廉同芝士粟米脆片，口感層次豐富。櫻花蝦熱狗 （$55）櫻花蝦多數係日本料理食到，用嚟做熱狗配料真係第一次食。 其實成個熱狗所用嘅配料都好日式，有明太子醬、蟹柳絲同蟹子。估唔到味道可以同熱狗咁夾。