火間土 (已結業)

今日食個hea lunch，揀咗北京道一號嘅火間土，全因呢個無敵海景。呢度裝修時尚雅緻，樓底夠高，又有seaview，環境不俗。午飯時間有好多Lunch set選擇，大部份百零蚊已經有交易，比我想像中便宜。我揀嘅係海鮮三味天婦羅便當定食$128，份量十足十，有沙律、刺生、魚生飯、壽司、天婦羅、蒸蛋、麵豉湯同餐飲，好在今日戰鬥力不俗，可以完全KO成份午餐。若果係食量比較少嘅女士，我諗可以两個人share一份。好友揀咗燒鯖花魚配豬肉生姜燒定食$88，賣相不俗，除咗燒鯖魚同豬肉之外，套餐仲配咗蘿蔔薯仔、滑豆腐、麵豉湯，都算相當豐富。食物質素有相當水準，魚生刺身都夠新鮮，鯖魚同豬肉生姜燒嘅味道都唔錯。咁嘅環境配咁嘅食物質素，賣咁嘅價錢，我個人認為性價比相當高，去TST揾食，呢度都算係一個不俗嘅選擇。