炯記手撕雞 (汝州街) (已結業)

下午係汝洲街近西九行街見到「炯記手撕雞」當然要入去試吓。坐位空間大，桌與桌間距都大，唔似其他食店話分枱但其實肩貼肩。我叫咗叉燒蛋包飯配特飲凍茘技蘇打，賣相好靚飯有鑊味好香口，叉燒炯記用骨腩入味有咬口，一口叉燒一口蛋包飯混住食好正！茘技蘇打好夠凍，夏日炎炎飲一啖簡直涼到入心入肺，搭配餐廳主打辣味，可以解辣。另外仲叫咗越式香茅雞翼蕃茄米線，米線少碎但蕃茄洋蔥湯好濃好夠味。香茅雞翼有四隻，皮勁脆，香茅味好出，推薦一試。至於上湯津白，湯好清但帶鮮味，上面加了火腿絲增加了層次，津白新鮮好味。最後有海蜇手撕雞腸粉，涼拌加腸粉呢個組合好新奇，甜中帶辣，軟中帶脆，素中帶葷，一次過滿足晒三個願望！兩個人埋單唔洗$200，食到好飽好抵食，絕對推薦！可以一食再食。