老鍋台式火鍋 (京都廣場) (已結業)

火鍋以外的養生米線 銅鑼灣老鍋台式火鍋喺銅鑼灣嘅老鍋台式火鍋除咗台式打邊爐之外，原來午餐時段都有養生米線食㗎！嚟到台灣餐廳食米線，湯底當然係台式嘅養生湯啦，但餐廳都搞搞意思，喺湯底加上酸菜或麻辣，令味道更有層次。台灣蒜香腸份量好多，煎過嘅香腸好香口，蒜味香濃。酸菜養生湯米線配料就揀咗鮮雞肉、豬腩片同鴨血。整體份量算多，但鮮雞肉就唔建議大家叫喇，因為雞肉好淋，完全無口感、相反豬腩片肥瘦分明，口感唔錯、而鴨血唔散，入口好嫩滑，好好味！至於湯底嘅配料就加咗酸菜，其實味道有啲似韓國泡菜，令本身甜甜哋嘅養生湯底，酸酸甜甜，夠晒開胃。麻辣養生湯米線麻辣湯底無得揀辣度，呢個位要扣少少分。至於麻辣湯底少少少少辣，另帶有少少麻香味，同樣地養生湯底本身甜甜哋，甜甜辣辣，夠醒胃。至於配料就揀咗雪花肥牛、蜂巢牛肚同鴨血，特別推介蜂巢牛肚，勁有口感，索晒麻辣味。冷泡白桃烏龍茶、冷泡雪梨桂花茶飲品方面，我哋一人一支冷泡茶，白桃同雪梨味道好突出，好鮮甜解喝。