板神鉄板燒日本料理 (The Hennessy) (已結業)

疫情下生活工作壓力大，除咗放假去staycation 之外，同朋友去間有格調嘅餐廳食飯放鬆，都係減壓嘅好方法！今晚同朋友兩個人去灣仔「板神鉄板燒」撐枱腳。餐廳位置尚算便利，灣仔地鐵站A3 出口，行五分鐘到Hennessy大廈，輕鬆搭𨋢上30/F就到。 餐廳環境非常舒適，空間感十足，座位亦寬敞。我哋各自揀咗一人前套餐，即使係一人前，食物嘅款式都非常多。除咗一般前菜、沙律之外，仲有和牛、鱈魚、龍蝦⋯非常期待！等咗一陣，前菜同沙律先上。無論器皿、食物擺位都十分精緻，味道方面比較清新開胃，特別和式三文魚沙律，酸酸甜甜，好味！隨之上場嘅係白鱈魚。有金箔加持嘅白鱈魚，肉質彈牙，感覺新鮮又矜貴！至於龍蝦，肉質鮮嫩，配合特別醬汁，鮮味更見提升！來到重頭戲：A5和牛薄燒! 香噴噴和牛圈住香葱花，啖啖焦香，入口即化；再食埋伴碟嘅鮮甜車厘茄同粟米芯，非常滿足。食完和牛後，店員就呈熱辣辣龍蝦麵豉湯！鮮甜解膩之選！套餐甜品係奶凍，雖然細細杯，但奶味十足，100分飯後小甜點！