來自大阪嘅「無限拉麵」落戶灣仔區，今日專登過嚟試！一入門口已經聞到陣陣牛骨湯香。店舖裝修完全係典型日式拉麵店風格，麻雀雖小五臟俱全，夠晒乾淨企理，真係有秒到日本嘅感覺～
特製和牛牛骨白湯拉麵 $168
真心無介紹錯！每日限量200碗真係有原因，個湯用牛骨熬到奶白色，濃到黏嘴唇，原來店家仲要用日本儀器測濃度，難怪咁足料！塊和牛慢煮10個鐘，入口即化得嚟又有咬口，油脂分布靚到似雪花。麵條指定粗度硬度，掛湯能力一流，每啖都係享受～
1
日式拌麵 $108
個人私心推薦！醬汁撈勻之後每條麵都掛滿蛋黃同特製醬油，食落鹹香帶微酸，好惹味開胃～最驚喜係店家提供一次性圍裙，唔怕撈果時彈到成身汁，超細心！
餃子 $45
煎到金黃蕾絲脆底，咬開肉汁爆出嚟，點埋醋食真係停唔到口～
青森蘋果汁 $20 / 烏龍茶 $20
食完濃味嘢飲返支冰凍嘅青森蘋果汁，或者烏龍茶解下油膩都唔錯～
總括嚟講，呢碗「特製和牛牛骨白湯拉麵」充分展現咗日本過江龍嘅功架。今次唯一遺憾係兩款人氣產品 —— 「雞皮餃子」同「牛骨麻辣叉燒拉麵」都早早售罄，唯有留待下次約埋朋友再黎闖關！
