吞POT 雞煲火鍋.住家菜 (已結業)

相信大家依期好少出街，更少去打邊爐，怕做下一個邊爐群組一員🤭今次唯有趁人少少去到旺角吞pot火鍋加雞煲，睇下佢嘅質素係點先！喺疫情期間人數的確少咗，啲空間都會多咗。不過本身餐廳嘅枱隔得都遠又加裝膠板，食客應該都旚心啲👍🏻落一個湯底，之後就要睇下啲餸，其實點餐紙上嘅食品價錢都合理，種類都好多，係怕自己叫完食唔晒咋！今次叫咗一個花雕藥膳雞湯底，你見啲料都真係好足，聞落更加有好濃郁嘅「藥材」味，就算係以前未食過藥膳嘅我，我都比佢嘅香味吸引到，今次實在冇試錯！淨係食啲雞見未飽就落多3個餸，第一個係「餃餃陣」有4種餃子嘅，分別有韭菜餃，鮮蝦雲吞，蟹肉雲吞，同魚皮餃。第二份係豬肉片，睇就好細份，食落就啱啱好（唔好睇少雞嘅份量！）第三份係粉絲，雖然一份要40幾蚊，但係佢比嘅份量係真係夠3個人份！所以想填一填肚，可以叫一份！食到咁上下口渴就當然要飲嘢，呢杯係大杯嘅咸檸七，飲過一啲酸酸咸咸嘅就好開胃啦！