廿一前 (已結業)

晏晝時段上去，見有食評話咩幾個後生開，係💛店，啲相影到咁靚咪上去試下囉。坐低，叫湯底，之後見到播緊三色台喎....職員嘅態度懶懶閑之餘，問乜都唔答，無交帶。一開波叫刺身，成半個鐘都未有。點左三文魚，點左幾次都消失左。而我座位係見到魚生部嘅阿姐，佢唔知做緊乜，整魚生好似整到一舊雞咁⋯⋯⋯慢吞吞，仲要成日同自己人吹水。然後，分別點左唔同嘅串物，但9樣有4樣係消失左，有啲又比錯晒。雞皮，三文魚點左幾次，到我埋單都無嚟過。追完一次又一次，每次侍應話「哦～我幫你睇下」，走人就無跟進，再問，都係講同一句。問佢點解有啲叫左幾次無嚟到，其實係咪無？侍應話「呃....我幫你問下」又係無左影。除了我個枱，當下我前後食客都係食到好枯燥。到後期，出現左一個白衫便服，但疑似老細，情況好轉左。首先，到埋單先解釋，是日無三文魚。我坐足兩個鐘，問左4個同事，竟然無一個答到我原來個日無三文魚。有碟送嘅刺身，都係要等到疑似老闆嚟，仲要我睇住佢插魚生部慢吞吞阿姐，之後先響我埋單個刻先出現。仲要唔新鮮⋯呢間野，試一次算數。最無言係，我用openrice訂位，有晒証據，但結果佢當我無去到，openrice都唔受理。