最先大家點左個抵食6人餐, 包括有:
冷盤: 脆皮腩仔 + 青瓜拼海蜇
腩肉的肥瘦比例剛好, 味道亦唔係太鹹, 皮又夠脆, 口感同味道都幾好.
青瓜拼海蜇的醬汁做得幾好, 够香够惹味, 辣度剛剛好. 青瓜清新爽脆, 海蜇够粗, 口感爽口彈牙.
花旗參燉烏雞雞腳瘦肉湯
食飯前先黎一碗足料燉湯, 用左大量瘦肉,雞腳同埋烏雞燉出黎的雞湯香味濃郁, 飲落仲有淡淡的花旗參甘味. 滋潤養顏又可去火, 補而不燥, 好適合而家的天氣.
炸子雞
上枱時已經聞到好香, 顏色又够靚非常吸引. 最重要嘅係外層的雞皮燒得都幾好, 够薄又够香脆. 而裡面的雞肉依然嫩滑多汁, 非常好味!
翡翠扣原隻鮮鮑魚
原隻新鮮鮑魚size 都唔係細咖, 口感彈牙又够鮮味.
清蒸沙巴龍躉
大約有1斤2兩重的蒸沙巴龍躉, 火喉掌握得剛剛好, 魚肉熟得黎唔會過老. 魚肉入口又滑又嫩, 而且因為魚够新鮮, 所以味道都好鮮甜.
濃湯鮮菌浸時菜
櫻花蝦海皇炒飯
炒飯炒得好香又够乾身, 飯粒粒粒分明又唔會過油, 水準唔錯.
黑糖紅棗糕 煙煙韌韌唔會太甜, 都OK.
後來因為怕唔够食, 所以追加左四個小炒. 價錢唔係好貴, 幾十蚊一碟, 但估唔到最後原來碟碟都咁大碟, 够哂抵食!
芹蒜鹹酸菜炆斑頭腩
相比之下係比較濃味的一道菜, 斑腩件都幾厚肉又够彈牙,冇咩魚骨啖啖肉, 配上惹味的醬汁, 非常適合送飯.
剁椒雪裡紅南瓜蒸斑球
望落去紅噹噹以為會辣, 但其實唔係. 斑球厚肉嫩滑, 清蒸更可以食出魚肉的鮮甜味. 而鋪底的南瓜片都唔差, 口感軟腍味道清甜.
櫻花蝦xo醬花生苗露荀炒蝦鬆
人生第一次食“花生苗”, 原來口感都唔差. 感覺似係食緊放大版的“黃豆芽”, 莖身仲粗過筷子頭, 口感爽味道清清地. 而上面真係有一粒花生係到, 但口感就有少少硬. 一道幾得意的鑊氣小炒, 未食過“花生苗”的都可以試下.
燒汁松子繡球真菌炒花枝柳
雖然係“燒汁”,但味道唔會好燶味, 剛剛好. 雪耳,甜豆,黃椒等蔬菌都好爽好脆, 花枝片够新鮮, 口感彈牙鮮味.
