眾里云云就揀左間專食海南雞既去試下先！佢位置地面，所以要出番去商場先會見到。
海南雞飯實際佢真係由海南黎 因為佢就係海南四大名菜之一既文昌雞（其他三項就係東山羊、加積鴨同樂蟹）有間食東山羊係觀塘下次可以介紹番！咁海南雞就由移民傳到去東南亞紅左又番番黎，情況就好似印度人帶左拉茶文化咁。
八點半去到都唔算都唔算好多人，都即刻有位坐。一打開餐牌，以為佢得幾味野，點知佢又有all day breakfast, pasta 跟住小食又有雞翼咁..應該都係食fusion野。唔理咁多叫個海南雞飯餐（叫餐加10蚊有埋湯同菜) = 75蚊
菜就真係普普通通 白灼菜，都幾大碗下！
跟住上個湯，佢個湯真係值得一讚，唔敢亂講係咪冇味精，但係至少應該煲左好耐，又會配同氣節去整岩既湯，唔會外面來來去去都係紅青羅白，讚讚讚！
最後就係重頭戲—海南雞飯
照舊都係三個醬，甜豉油，薑蓉同埋泰式辣醬
甜豉油—唔算太甜同埋唔太杰身
薑蓉—好中式口味但略太多油係底（可以多渣少油）
泰式辣醬—非常入味
雞就真係普普通通，應該可以再咸Ｄ，但明白口味既野個個唔同
唯一敗筆———油飯
色澤就正路，但係只有其色，未有其味—冇雞油個味。
最差差差就係個飯，完全冇一粒粒感覺，痴到實一實，唔知落得太多水定擺得太耐。
睇下張圖就明，飯痴埋一齊，冇口感，味道又真係一般。真係有好大進步空間。
between 佢個杯幾好睇 有自己公司logo
