六合小廚 (已結業)

呢日同呀媽去完中港城買船飛搵地方食晚飯，行返出Apple shop嗰邊，經過有幢大廈門口，有姐姐好積極叫我哋上7樓食飯，車仔麵小菜都有。行嚟行去，已經好攰就上去試下啦😀。上到去都有唔少食客，店員話午餐仲有得叫。不過我哋想叫餸食飯，餐廳有幾款2人套餐揀，我哋揀咗有蝦個款($388)，因為樣樣都啱食。呢日嘅明火例湯係南瓜青紅蘿蔔湯，好大碗，仲有好多湯渣添🎃🥕，有南瓜所以幾甜。港式叉燒拼白切雞🐓，味道幾好，叉燒肥瘦適中；雞就雞胸同雞髀都有。蒜蓉蒸海蝦🦐，開邊蒸上碟好吸引，份量超多，蝦好新鮮，食哂蝦已經食唔落粉絲。帶子炒西蘭花🥦，帶子有好多粒，幾好味，有碟菜清清地唔錯。總括嚟講，食完我可以肯定講呢個唔係2人餐，因為份量超多🤣，加多2碗白飯夠4個人食呀。餐廳環境無乜特別，正正常常，但都闊落有卡位坐，而店員都幾友善，有笑容👍。餐廳除咗小菜外，仲有車仔麵、水餃、芝士撈丁等等賣，都幾多選擇。