六合小巷 (已結業)

有陣時尋尋覓覓想搵到道地好味道唔係咁易，譬如我上個禮拜突然好想食台灣嘢，好彩有朋友係識食之人，帶我係北角嘅一處巷仔搵到間比到我好多驚喜嘅餐廳。六合小巷嘅裝修都幾有夜市feel，燈光舒服。我地兩個人叫咗鹽酥豬排麵同台式鵪鶉蛋滷肉飯做主食。豬排麵我就揀咗幼麵。特別嘅係，佢嘅湯係可以無限任添嘅，尤其岩宜家凍冰冰嘅天氣。飲一啖，豬骨嘅香味暖入心，真係無得頂。小食方面我地就叫咗三款，分別係鹽酥魷魚鬚，鹽酥原條茄子同埋一口鹽酥雞。朋友最鍾意鹽酥魷魚鬚，佢炸嘅火候岩岩好，入口酥脆又唔油膩。我最心水係一口鹽酥雞，雞粒外脆內juicy，面頭有炸過嘅九層塔，好正宗！鹽酥原條茄子都好有驚喜，真係成條咁上，有我手臂咁長，切做頭部連結住嘅條狀，用黎打卡就最fit喇。嘢飲都正呀，茉香奶茶加桂花凍有真正花香味，香芋奶茶竟然有芋泥，珍珠都勁有咬口。