呢度就好似日式小區內嘅小店一樣，選擇不多，食材亦都簡單，有丼飯或讚岐烏冬可供選擇。
枱上面放咗七味粉，如果食烏冬就最啱不過啦！
照燒雞翼溫泉蛋飯大大碟，女士們其實可以選擇少飯。佢嘅溫泉蛋做得非常出色，用嚟撈飯真係冇得輸。
我呢個照燒雞翼溫泉蛋總共有三隻照燒雞翼，雞翼用半煎炸嘅烹煮方法，味道不錯。
另外仲叫咗吉列豬扒溫泉蛋飯，飯底同溫泉蛋同前者大致相同。
吉列豬扒好大塊，店員已經將豬扒切成條狀，方便食客享用。
吉列豬扒不厚不薄，而且唔會有太多脂肪嘅部份。
跟餐仲會包埋飲品，可以選擇可樂、雪碧、或者紙包裝甘蔗汁，因為唔太鍾意飲汽水，所以我哋選擇咗甘蔗汁。
雖然呢度嘅食物都係好簡單，但亦好似日式小店咁會有簡單嘅擺盤，而且價錢亦都非常相宜，如果想簡單食返一餐，呢度都係一個好選擇。
