日日涮 (已結業)

好日都唔會去美孚，如果唔係住美孚既同事強烈推薦呢間日日涮再加上呢排好想食肉，真係唔會嚟呢度🤪呢度既火鍋放題包括海鮮盛合、刺身拼盤，再喺四款牛肉中揀你要食既種類。落單後隨即送上刺身拼盤，有牡丹蝦、三文魚、北寄貝、吞拿魚同海膽。除左三文魚同吞拿魚唔夠肥美，其他都好正常，而海膽都算鮮甜！之後就上左海鮮盛合，一放上枱已經留意到鮑魚仲識郁，仲有大大隻龍蝦、大大條蟶子、鮮甜沙白、生蠔、扇貝、貴妃蚌同蝦，樣樣都好新鮮彈牙兼無沙，就算淥耐左都唔會韌，好好味！到牛肉喇，今次揀左美國頂級牛小排，雖然無咩牛味，但肉質嫩滑，食左兩碟！仲有黑毛豬豚肉，本身打邊爐唔鍾意食豬肉，但呢隻黑毛豬又唔錯wor！另外，餐廳中間有好多款蔬菜、菇、丸、麵、烏冬等等。飲品都係任飲，而且選擇好多！最後有Movenpick同Hagaan Daz選擇，一人一杯，仲有好多隻味揀！好似無提過湯底，有六款選擇，可以揀兩款，我哋揀左日式壽喜燒同骨膠原雞湯，但兩款都普普通通，無特別。總括嚟講，個人認為呢度海鮮出色過牛肉，服務態度好好，速度好快，環境闊落乾淨，可以一試！