break (已結業)

公司附近嘅新商廈海濱匯入面有好多新嘅餐廳，我久唔久都會過嚟試下，今日又過嚟嚐新，揀咗呢間咁有綠化氣息嘅 cafe。餐廳除咗主打嘅精品咖啡之外，仲有好多花茶、冰搖茶同埋特飲，我揀咗呢杯榛子朱古力，朱古力嘅味道香濃，同榛子味非常配襯。一口炸池魚，呢個小食喺呢一個地方賣28蚊，目測都有成二十幾條，幾乎做到一蚊一條，抵食之餘質素仲相當之高，入口有好重魚味，炸得乾身香脆，係非常好嘅一道小食。香煎牛側腹半熟西洋梨子、鹽漬柚子皮、香蔥葡萄柚醬油、珍珠米。牛側腹上面一粒粒嘅係葡萄柚醬油，做到好似三文魚子咁樣，食落口都有卜果一下爆裂嘅感覺，帶點分子料理嘅意味；牛味令人滿意，廚師將佢啱啱好煎到半熟，裏面係可遇不可求嘅粉紅色，口感非常軟嫩。鹽漬柚子皮同平時點燒肉嘅一款醬汁有啲相似，半熟西洋梨口感特別，佢保留咗梨嘅清甜但係無生食咁爽，食蘋果鍾意食粉嘅朋友應該會鍾意。