小窩雞海南雞專門店 (已結業)

放工見到有新舖，裝飾光猛乾淨，見有啲肚餓，即刻入去試下，叫左個海南雞飯，配杯凍檸茶。一試之下真係不得了，雞肉非常之咁嫩滑，皮下仲有啫喱，但又唔會見血水，火侯掌握得剛剛好，應該淥熟後仲有過凍水，廚房做足步驟，有比心機，一啲都無偷懶！碗飯都好好味道，飯質好鬼軟熟，油香仲撲鼻而來，而且有炸蒜碎放左落去，非常之咁惹味。嗰杯檸茶茶底清，唔係比千年舊茶，依家香港地飲到呢杯檸茶，其實已經非常難得！之後一定會再來！