藍象泰國餐廳 (已結業)

早前見到朋友猛話呢間泰茶好食、正宗、特別，搞到我都心思思要黎試下，好啦～book左晚上7:00，當時餐廳人唔多，但到大約8:00開始多人喔，所以都係book檯穩陣(笑)2個人想食野種類多少少，但唔怕食唔哂，可以叫半份魚餅，2件開4，上碟唔會太肉酸(哈哈) 魚餅好大陣香茅香草嘅味，口感比較稔，彈牙多少少更好。另外都可叫多半份雞肉春卷，同樣2條開4件，炸得唔錯，好脆而且唔油膩，但雞肉略嫌乾左D，整體都可以嘅。辣椒膏炒蜆有驚喜，蜆肉大粒而且鮮甜，食咁多粒都冇沙，個汁甜甜辣辣非常惹味，即刻食唔停口。再叫左紅咖哩雞肉，份量細細的，真係食到辣，好多泰國菜嘅咖哩都得好少好少辣，感覺唔夠過癮(笑) 而咖哩味夠香夠濃 咖哩汁唔會太稀太水，配埋薄餅點多啲汁，正吖喂，推薦。仲有魚露蝦乾炒椰菜苗，以用魚露會比較咸啦，點知又唔會喎，咸得黎有少少甜中和左，蝦乾香味反而唔突出，菜苗炒得唔錯呀。最後當然唔少得芒果黑白糯米飯啦～擺盤好精緻，我愛白糯米多啲，上面有椰漿之餘仲有乾左脆脆嘅椰絲，唔錯唔錯，好味。