地點：油麻地彌敦道
菜式：中式點心
餐牌：餃點類，酥點類，生滾粥，小食，中點類，包點類，腸粉類，飲品，蔬菜類，原盅燉湯，甜點類，籠仔蒸飯類。價錢親民。茶位每位$5。落單用QR Code。
蝦餃 (4粒) $32
蝦餃塊皮少少厚，入面餡料爽口，無辣椒醬食都唔錯。
燒賣 (4粒) $30
燒賣真係有大大粒蝦係面，面頭再加上蟹籽，下底係啖啖肉爽脆唔肥，仲有冬菇味，真正皮薄餡靚。
呢度可以選擇叫蝦餃燒賣4粒或者兩粒，價錢除返每粒係一樣，好貼心！
黑松露菜苗餃 $27
黑松露菜苗餃一客三隻，煙韌透明餃子皮包住爽口蝦肉同菜苗，面頭加上紅蘿蔔絲同黑松露醬，賣相不俗。食落口感唔錯，味道就清淡，黑松露醬味道較淡。
豉汁蒸鳳爪 $21
豉汁蒸鳳爪一客有4件鳳爪，整得好淋，味道都唔錯。下底加左幾粒花生，伴有一片紅椒同綠椒。
醬皇金錢肚 $25
醬皇金錢肚有4塊，口感係完美爽口彈彈地牙又滑滑地，個汁少少辣，好惹味，唔會太油或者重口味，加上紅綠辣椒片。下底有3粒冬瓜粒，可降低油膩感。
燒汁釀虎皮椒 $24
燒汁釀虎皮椒一客四件，紅綠椒各二。面頭鯪魚肉好彈牙，鯪魚味鮮，鯪魚肉份量都唔少。食落只係微辣，油份略重。面頭加上幾條菜苗裝飾。
欖仁榴槤酥 $30
欖仁榴槤酥一客三件，一上枱就聞到好香榴槤味。熱辣辣上枱，連隻碟都係熱。食落外酥內軟，唔算太脆，榴槤味就剛好，唔會過火，面頭有欖仁。
所有點心都係即叫即整，熱辣辣上枱，質素高，而價錢並唔貴，無加一。環境算乾淨企理，食左咁多點心人均都唔洗一舊水。
