1
今次兩個女仔嚟食冇叫太多肉類，牛豬各一款，兩者都係我每次嚟必點嘅－先有招牌嘅喜來烤肉，牛肉薄切用秘製醬汁醃製，捲成花狀細細碟但其實逐塊燒份量都幾足，燒過後夠油香帶少少甜味。
護心肉係豬嘅稀有部位，食落有嚼勁唔肥膩，最好味一定係用生菜包起，配埋韓式辣醬、泡菜、蒜片、洋蔥一齊食，特別滋味呢！
食完濃味嘅燒肉就食個水冷麵中和番－蕎麥麵幼細口感非常煙韌，湯底冰涼酸味味特別透心涼，可以按自己口味加白醋同芥辣，仲有爽口嘅青瓜絲同蘿蔔片添～
最後不得不提嘅當然有爐邊蛋，泡菜、芝士各一邊，無限refill食到飽😋
